Nas nosas actuacións empregamos diferentes instrumentos tradicionais de Galicia, a maioría por todos coñecidos. O instrumento de vento galego por escelencia é a gaita, que basicamente está composto dun fol de coiro ou gore-tex, un vestido para o fol, un ronco que dá unha única nota acompañando á melodía, o punteiro que é a parte que fai esa melodía e nalgúns casos a ronqueta e o chillón. Como instrumentos percutivos para complementar á melodía empréganse:

O tamboril, que consiste nun cilindro de madeira alongado, no que as bases están cubertas por dous parches de pel axustados mediante aros que se unen entre si por unha corda tensada dun a outro alternativamente. Estes poden ter bordóns de tripa, tanto no superior como no inferior. Tócase pendurado da cintura e tánxese con dúas baquetas de madeira collidas de distinto xeito con cada man.

O bombo, que é un tambor cilíndrico de grandes dimensións que se caracteriza pola ausencia de bordóns e, polo tanto, cando é tanxido, as súas peles vibran libremente cunha sonoridade profunda e difusa.

A pandeireta, que consiste nun aro de madeira circular con dúas filas de ferreñas (círculos cortados de folla de lata e agrupados de dous en dous), que se distribúen ó longo do aro, alternadas, e soan nas pequenas aberturas cando a pandeireta é golpeada, percutida, ou sacudida. Un dos lados está cuberto por un parche de pel tensa.

Moitas veces acompañando ás voces fanse uso de utensilios cotiás para levar diferentes ritmos como é o caso das piñas, que raspando unha contra outra marcan perfectamente ritmo da cantiga que se interpreta. As latas de pementón de gran tamaño, tocada sentada e batendo nela contra coas dúas mans e amaprándoa co peito tamén foi un útil moi empregado polas antigas cantareiras, xa que supuxo unha maneira económica de obter un instrumento percutivo que acompañase á cantiga. O mesmo pasa cos platos de lata e os dedais que cunha man amárase o prato e tócase o cú igual ca unha pandeireta, pero neste caso os dedos van cubertos de dedais que fan posible a peculiar sonoridade deste instrumento.